市場熱線：中燃有勢追落後

港股不嬲係「放大器」，升跌都多過人，尋日亞洲魚缸淨得香港升超過3%，日本升1.3%，新加坡升0.8%，A股呢排反而最穩定，連火車股都見底反彈，基本上逢親超賣股均博得過，至於強勢股亦大部分保持強勢，創新高嘅包括兩大本地電訊股、兩隻電池股同兩隻零售股。

睇番自從前一個星期，標準普爾剔除美國AAA債務評級，環球股市人人自危，可是央行同銀行賓架驚都未驚過，美債不跌反升，上周中當股市參與者發覺自己睇錯市，歐美股市率先作出修正，歐洲三大指數已經升番去標普向美國放毒箭前水平，道指亦只係跌1.5%，相反港股尋日開市前計，仲累跌緊6.3%，可以話唔賭反彈絕對係執輸行頭。

綜觀市場開始由恐慌回到平靜，幾隻畀空軍隊到開巷的內銀股，開始有分析員在業績前掉頭唱番好，大市的確有條件升上20,500至21,000點之間。至於之後會點？毫無疑問要睇內地緊縮政策，仲要玩幾耐至肯落幕。

夠膽入市就有斬獲

其實尋日升勢好全面，水泥股報復式反彈，排住隊炒業績，大升仲有保險股、燈膽股、航運股、超賣股，連個主要股東仙遊嘅新昌營造（00404）亦升上榜，總之夠膽買就掂。燈膽股較為冷門，雖然係雷士照明（02222）發盈喜所帶動，但連業績差嘅真明麗（01868）都升14%，唔通要多謝香港政府要淘汰鎢絲燈膽？

雨潤（01068）同味千（00538）兩間公司畀祖國傳媒窮追猛打，但雨潤倒升，味千亦喺低位反彈1蚊，復牌算跌得少，因為停牌期間避過股災，依家往績PE仲有成23倍，未計今次商譽大損失。

一拖市佔率續攀升

古勝隻愛股一拖（00038）派成績表僅賺多2%，股價即插6%，主要原因係原材料價升搞到毛利率下跌，但收入仍增長兩成。高增長股值高PE、低增長低PE係人都識，但買增長股有樣風險，就係高增長未必可維持，例如經營環境有變、產品老化或者競爭加劇等原因。不過，一拖唔係上述呢幾類，公司市佔率仍然上升，PE只係單位數字，所以不妨候低吸納。

中國同俄羅斯嘅天然氣談判傾咗好耐仲未傾得成，最主要都係價錢問題，但燃氣股呢排穩陣得嚟算有升勢，一來佢有一半公用股防守特性，二來業務繼續有增長。

民用氣價有望「補加」

中國燃氣（00384）算係跌得比較多，由3蚊樓上插到兩蚊樓下，但低位反彈亦快，尋日已回升到2.46元收市。呢隻不嬲係上落得較快嘅燃氣股，早輪個主席被拉走，古勝反而建議可以趁機短炒，因為隨時會有爭權奪利事件，果然先後傳出華潤燃氣（01193）同昆侖能源（00135）等有機會收購，不過跟住又有股東內訌，炒上之後又炒落。

古勝一向形容中燃係「聯合國」，但自從劉明輝「失蹤」之後，6大股東竟然冇人增持或減持，相當耐人尋味。

暫時將爭權奪利劇情放埋一邊，中燃下半年度（三月年結）業績已有改善，之前係受LPG業務拖累，但三月收購下游百江燃氣之後應該可以提高毛利率，今年度預測PE只係10倍，如果未來祖國通脹回落嘅話，民用燃氣價格有望「補加」，另外博中俄談判有進展，中燃有得追落後。

古勝