晶門科技（02878）尋日宣布入股一家專門生產互聯網電視所用晶片嘅公司C2 Microsystems Inc.，晶門業務營運副總裁張惠權更即席展示配置咗呢種晶片嘅互聯網電視各種功能。
晶門話呢種新晶片嘅賣點，係可以為電視安裝依家智能手機界好熱門嘅Android系統，一部電視就可以有集合睇電視、睇碟、上網、打機等功能，直頭係將電腦及電視合二為一，仲有埋3D效果，可隨意將2D影片轉做3D添！
絲絲尋日現場睇完示範，覺得用咗呢隻晶片嘅互聯網電視功能確係唔錯，3D效果比起入戲院睇3D電影一啲都唔輸蝕，上網速度亦好快，平時用電腦上網做嘅嘢，例如睇短片、上社交網站、與朋友即時通訊等全部做到。
不過對佢哋尋日力銷嘅另一個重點，話互聯網電視可為用戶帶嚟另一種生活方式，絲絲就有啲保留。佢哋就話有咗呢種互聯網電視，一家大細就可以一齊坐喺廳度，一邊睇電視，一邊開住即時通訊軟件與親友討論，但絲絲心諗，如果阿爸阿媽睇電視，阿女未曝光嘅Honey忽然彈咗個情意綿綿嘅口訊出嚟，咁咪穿晒煲？
余絲韻