內地房地產嘅「老大」萬科，去年銷售喺逆市下突破千億元，唔少內房企業都希望可以佢哋為目標，有啲甚至想取代佢哋嘅一哥地位，但萬科總裁郁亮就話，其實做老大有乜好，況且做老大好辛苦，一啲都唔易做！佢仲話下半年內地樓市隨時會供過於求，發展商壓力好大，所以個個都好瘦，唔怪得絲絲今次見到郁總又瘦咗個碼啦！
做老大有乜壓力？郁總話做老大有好多嘢要考慮，行業有問題，好多人都會去問佢，要有老大嘅樣，唔可以扮調皮可愛及亂講嘢，就好似萬科今年第4次人事變動咁，又令人以為有乜問題。
近兩年內房業面對唔少風風雨雨，內地宏調未停過，郁總話其實調控對每家發展商都有影響，就好似天氣凍嘅時候，如果你有好好鍛煉過而身體好嘅，又或者你有準備，自然可以捱過。萬科自今年以來都冇乜買地，佢解釋話其實喺○八年後，佢哋已經好審慎，仲規定唔可以拎地王，下半年都會繼續咁審慎，不過見到調控開始到位，特別係一線城市，如果有機會都有興趣喺北京、上海拎地，至於下半年仲有冇調控措施，佢就話要問總理先知喇！
余絲韻