如果想提升員工嘅工作效率，淨係得免費咖啡係唔夠o架，可以學吓美國嘅企業，畀員工喺屋企「辦公」、自由放假，甚至提供免費打肉毒桿菌（Botox）嘅福利，咁你嘅公司員工流失率必定係全港最低！
美國財經網站CNBC最近做咗項調查，揀咗11家福利最好嘅企業。依家科技企業仍然係福利最好嘅行業，例如網上影片出租網站Netflix就畀員工隨心所欲放假，每年仲有一萬美元醫療津貼，就算用唔晒都可以儲起佢。
人力資源公司Akraya就准許員工喺屋企工作，仲每兩周派專業清潔工上門打掃。網絡公司Dropbox就好似俱樂部咁，除咗有房畀員工玩樂器，仲買埋跳舞機、Laser Tag射擊遊戲裝備，等員工可以隨時鬆一鬆。
至於講到最慷慨嘅公司，就係天然氣企業Chesapeake，淨係佢哋間健身中心面積就有7萬幾呎，仲有教練免費指導，員工又可以喺公司附設嘅醫療中心接受免費醫療服務，就連打Botox都唔使錢。
呢11家福利最好嘅公司都畀到員工唔錯嘅薪水，絕對冇「揩油」o架。
余絲韻