絲絲講場：李小琳Dior新裝賀佳績
「女為悅己者容」，試問邊有女人唔貪靚？每次出席公開場合都艷壓全場嘅「中國女電王」——中國電力（02380）主席李小琳，尋日以一身穩重之中帶點嬌麗嘅紫身套裝裙，配上白色珍珠頸鏈及白色花花心口針嘅雍容華貴裝扮出席業績發布會，理所當然「謀殺」咗攝記大佬唔少菲林。
展示最新秋冬款式
眾所周知，李小琳一向走在潮流尖端，亦係各大時裝名牌嘅擁躉。據絲絲收風所知，原來佢尋日呢身打扮殊不簡單，正係出自國際知名品牌Dior嘅今年秋冬款式。雖然近期香港天氣好熱，但李小琳仍穿上今年秋冬新裝會見分析員及記者，可見佢對大家幾咁重視。
絲絲記得，李小琳過往幾次均以Chanel時裝亮相，好似今年五月嘅股東會，佢就穿着Chanel嘅今年春夏系列，仲係香港買唔到嘅款，絲絲閨中密友話，淨係上衫都應該價值超過5萬蚊，就連珠鏈都係Chanel出品。
港交所網頁尋日出現故障，連累包括國電在內嘅幾間公司喺下晝被迫停牌，不過完全無損李小琳嘅心情，而國電尋日公布嘅業績亦都「靚仔」。
余絲韻