市場熱線：海爾轉型有運行

呢排正值多事之秋，南北韓又埋牙，連港交所（00388）嘅「披露易」網站都冧埋機，咁啱港交所自己派成績表，真係失禮死人，而且下晝開波1分鐘先緊急煞掣，嚇親班市佬，但創維（00751）又唔使停牌喎，唔通覺得七月份電視機銷量唔重要？

阿伯依然留有一手

孖屐有人話不排除係被黑客入侵，唔通有電腦高手輸錢太多惱羞成怒？呢排係放榜期，如果港交所唔搞好啲網絡保安，肯定魚缸大亂。大笨象（00005）同港交所都係大粒佬，拖住幾百隻輪，加埋個市波動，輪商都唔知點做對沖，輪民更加被迫要過夜，如果輸咗唔知搵邊個賠。

聯儲局開會冇提過QE3，但話必要時採取進一步措施刺激經濟，古勝覺得阿伯今次幾高招，明知QE3冇用，不如留低條尾巴畀你憧憬吓，更加有穩定大市作用。兩年內唔加息更擺明出口術，邊個知兩年內會發生乜事？香港要陪美國唔准加息，不過新做按揭仍有加息壓力，依家連大錢莊做定存都有一厘幾息，低息年代已過去。

○九年估美國息口有回升風險的專家，老早收聲了。一三年美國是否有能力加息，現在似乎言之尚早，由日本的情況到美國的重蹈覆轍，美國低息恒常化的可能性愈來愈大。大環境對高息股有利，會吸引需要穩定現金回報的投資者，睇番標普五百指數裏面，有超過5.5厘以上預期股息率，有22隻之多。

唔想隔山買牛，高息股有唔少選擇，兩電低位反彈之後，一一年預期息率稍低於4厘，逼近近年低點。每年營運現金流接近2,500億元人民幣的內地電訊巨無霸祖國移動（00941），其實被市場忽視。

恒指上唔番2萬點，收報19,783點，期指大低水159點，個市睇落冇乜條件大幅反彈，未來要睇住美國經濟數據同意西CDS走勢，美國經濟數據一直好反覆。歐洲較為牙煙，歐洲央行用20億歐元買意西債只係杯水車薪，最終會燒去法蘭西，隨時陪美國3條煙不保。

二三線股老早已股災，尋日仍有380隻股票下跌，56隻創52周新低，包括重農行（03618）、中海發展（01138）同阿里巴巴（01688）等。講到差，昂納光通信（00877）13連跌問你死未？創新高嘅得康師傅（00322），食品股亦係經濟衰退時期嘅抗跌股，但最掂係雨潤（01068），細摩唱好完又到大摩，同六月尾被空軍蹂躪差得遠。

終會出售製造業務

呢排好多鐵股都死，但海爾電器（01169）尋日收報8.67元，堪稱鐵股中嘅鐵股，間公司差唔多每個月都有新消息公布，最新一單係美國基金凱雷認購CB同認股證，行使價分別係10.67元及11.2元。凱雷之前買賣太保（02601）贏大鑊，睇中海爾事必有因。

上月尾佢阿媽收購咗三洋嘅白色家電資產，豈非構成母子競爭？非也，三洋所賣嘅只係日本同東南亞業務，海爾順手可以執埋三洋嘅家電製造技術。不過，古勝一直認為海爾最終會將製造業務賣晒畀阿媽，自己專心做「農村國美」。

事實上，海爾近一年每月都有收購行動，包括零售網絡、網上銷售平台、售後服務、分銷、物流等，整完對眼再整個鼻，轉型得不經不覺。不過，家電股最緊要睇住家電下鄉到年底之後仲有冇得玩，既然凱雷入股，祖國咁着緊推動內需，所以古勝投以信心一票。

古勝