絲絲講場：中海宏洋係巡洋艦？
唔知係咪男人特別鍾意啲車呀船呀，所以連講比喻都會同呢啲有關。前身為蜆殼電器嘅中海宏洋（00081）自從畀中國海外（00688）收歸後，搖身一變成為內房股，喺「阿媽」照顧之下，中海宏洋嘅中期業績仲非常「靚仔」。雖然中海老細孔慶平話兩家公司分工清晰，不過絲絲有老友依然擔心佢哋會自己人搶自己人生意，但孔總就大派定心丸話，688就係航空母艦，81就係巡洋艦，個海咁大，可以有好多聯合艦航行o架嘛！
與中海並駕齊驅
中海宏洋喺○九年被中海收購，去年二月完成重組，依家中海揸住中海宏洋約37.9%股權，喺分工上，中海集中做一、二線城市，中海宏洋就做三、四線城市。喺依家內地調控環境下，中海都要去三、四線城市避吓風頭，不過孔總話兩公司都會以唔喺同一城市發展為首要考慮，定位方面亦會因為各自實力唔同而唔一樣，佢相信依照目前81走嘅路線，第日會成為一隻小688，仲會有好快速嘅增長，但咁樣並唔代表688會放慢，佢相信可以「並駕齊驅」！
余絲韻