匯海策略：風高浪急黃金獨強
近期美國佬真係累街坊，總統奧巴馬親自現身出來自圓其說亦無用，紙永遠包不住火，美國經濟底子之差如今已無人不知。
歐洲方面亦不好過，西班牙及意大利國債等緊人買，就算歐洲央行（ECB）表示已作好準備買入上述國家債券，但投資者已經給希臘及愛爾蘭等經濟狀況嚇至面無血色，事關區內仲有幾多個「希臘」仍未知。
昨日執筆時，美國聯邦公開市場委員會（FOMC）仍然未公布議息結果，而市場則等待伯南克有甚麼言論發表。不過，此前投資市場已驚濤駭浪，港股先急挫後反彈再急跌，最後收報19,330點，成交增加配合跌勢。
油價受市場憂慮美國經濟或呈二次衰退而急跌，昨日紐約期油失守80美元一桶，並低見75.71美元。金價續創新高，話咁快升穿1,750美元，真係強到你唔信！
市場憂慮二次衰退
大家如果有點記憶，應該記得金融海嘯之初時的情況，當時環球股市大幅波動，商品貨幣急插，資金流入美元及貴金屬避險。而近日此情此景正重新上演，金價飛升，歐美亞太區股市暴瀉，雖然美國主權評級被下調，但債息不升反跌，昨日美國十年期國債孳息，才從早前近○九年一月的低位彈升10個基點，至2.42厘。
綜合而言，短期各投資市場相當兇險，未來前景根本「神仙難測」，如果當下有人話你知今日那種貨幣會強/弱勢，你都要考慮下這個是否你朋友。策略上，股市及匯市前景甚不明朗，建議保守者暫時離場觀望，若然真係忍唔到手，只建議小注投機買入黃金類投資產品，但切記嚴守止蝕。
阿Lam