市場熱線：和黃小注試水溫

大上大落場面激

尋日港股下晝嗰陣係威係勢主要跟住外圍，滬綜指低開3.4%之後，收市幾乎完全收復失地，道指期貨一度倒升超過300點，但原來又係虛火。港股早兩日亦試過3點開始跌幅大收窄，但都係呃鬼食豆腐，第二日又再衰多兩錢重，前日兩粒鐘之後外圍已打回原形，道指期貨亞洲時段因為成交少其實信唔過，傳推QE3更加係無厘頭。下晝無端挾上要研究吓大戶嘅目的，如果係為咗震走淡倉嘅話，港股恐怕仲有排跌。

港股6連跌，已經唔見咗三千幾點，就算比起外圍都係超賣。尋日大上大落，期指成交激增到接近23萬張，港股成交金額亦升到1,170億元，沽空更增至121億元，但窩輪成交就大跌四成，原因係引伸波幅亂到七彩，結果搞到Call、Put齊升，有幾隻Call輪更狂升過倍。

祖國唔敢亂加息

尋朝祖國公布七月份CPI係6.5%，雖然略為高過預期，但孖屐已經冇乜反應，一來呢排油價同金屬價格係咁跌，未來通脹壓力減輕；二來中國仲點敢亂加息？所以孖屐已經當中國加息期完咗，古勝維持A股可以跑贏其他魚缸嘅預測。下晝香港賣地亦注意力大減，雖然地價遠低過預期，但見股市咁插法，地主佬出價審慎亦屬正常。

市場關注美國議息，阿伯好大機會開劑QE3止痛藥，最慘係美國佬依然係自大到無可救藥，奧巴馬話美國「永遠係3條煙」，巴菲特話美國值「4條煙」，周星馳夠有「5條煙」啦！原來美國都有阿Q精神。

尋日逆市上升嘅股數有153隻，又唔差喎！通常個股會先大市跌而跌、先大市升而升，但升嘅股比較騎呢，「即沉板」（01888）專揀大跌市至升，ASM太平洋（00522）前日亦逆市上升，乜唔係同消費電子有關嘅股最受經濟環境影響嘅咩？但瀚宇博德（00667）私有化就令投資者對呢類上游股嘅估值提高。而青啤（00168）竟然創52周新高，但只係錯價啫。

業務勝在多元化

唔賭唔知時運高，呢兩、三日已有唔少「勇」字派撈底，古勝忍手咗兩日，今日揀隻和黃（00013）小注試吓水溫，隻股自從派成績表略賺少過預期之後，呢3日夾埋累積跌咗16%。公司有咁多業務，部分難免受國際經濟環境影響，例如石油同碼頭業務，但部分業務如本港零售、電力同電訊等則會繼續向好，綜合企業股嘅好處係可以自動平衡風險，所以喺不穩定嘅市況會跑贏大市。

老實講，古勝只係抱住小注怡情性質，博吓跌得多有反彈，「超人」亦話明有增冇減。

古勝