絲絲講場：富達基金調查：「80後」理財唔多掂
富達基金尋日公布咗一項關於「80後青年理財計劃」嘅調查結果，調查訪問咗534名年齡21至30歲年輕人（即所謂「80後」）嘅理財狀況，原來大多數「80後」儲錢都係為咗短期目標，而且回報唔理想，亦好少搵投資顧問幫手投資喎！
報告話，有80%嘅受訪者儲錢係為咗緊急用途，有48%人係為咗去旅行，有42%人係為咗購物，有47%人就話會將花紅或額外收入用於消閒娛樂，而受訪者平均每月仲有26%嘅收入唔知使咗去邊！
投資回報期望過高
同時佢哋又對自己嘅退休生活期望好高，有52%人就預期退休生活會好過自己父母，佢哋好多人都期望強積金可支持大部分嘅退休使費，但又唔滿意強積金嘅回報。富達基金香港主管程劍慧就話，如果佢哋要實現目標，就應該睇得長遠啲，以及利用其他儲蓄計劃及強積金互保。
報告仲話，其實「80後」青年都幾大想頭，平均要求19%嘅投資回報。程劍慧認為，呢個回報率長遠嚟講好難實現，所以佢哋多數人都對自己嘅投資經驗表示失望，佢就建議年輕人應該培養自律精神、早啲訂立目標、平衡風險及回報，尋求多啲專業意見以及定期管理資產配置。
余絲韻