絲絲講場：恒生贊助再生勇士選舉
恒生（00011）剛啱公布嘅中期業績並冇令到市場失望，咁點解副董事長兼行政總裁梁高美懿話睇到近期新聞就覺得「肉赤」？原來佢講緊時下有唔少年輕人遇到些少挫折，就選擇輕生，令佢覺得好可惜。
梁太勉勵年輕人
梁太話，有唔少人面對逆境及病困仍然勇敢面對，演繹出生命彩虹，所以恒生贊助咗再生會，舉辦「十大再生勇士選舉」，期望大家向呢啲生命勇士學習及致敬。梁太更引用魯迅嘅名句：「有存在就有希望，有希望就有光明。」勉勵在場嘅過百位年輕人。
梁太嘅分享當然感人，不過喺贊助儀式開始之前都有段小插曲，絲絲見到一個老朋友經過會場，佢就係退咗休冇耐嘅現任滙控（00005）顧問鄭海泉（Vincent），Vincent話佢咁啱嚟搵朋友敍舊。Vincent做過6年恒生行政總裁，陪伴恒生度過沙士及金融風暴嘅困難時刻，喺呢度自然有唔少老友及難忘回憶。
余絲韻