市場熱線：市況未穩 繼續觀望

美國失去三條A，昨早市美元沒像預期般下瀉，早段澳元兌美元更跌穿1.04關口，我們的主角─被降級的美債，十年期孳息輕微抽高後，立即掉頭連2.5厘都跌穿埋，見2.47厘，預期孳息曲線因為降評級而抽升，結果無出現。

債券市場具啟示性

有別於股市，債市參與者一般是央行及大型銀行操盤手，唔係話唔會睇錯，但對經濟前景洞察力，會比股市投資者來得深謀遠慮，到底佢對美匯美債太樂觀？抑或股市反應過敏？兩者中應有一個站錯邊，但筆者相信要多幾日時間證明，惟有暫作壁上觀，睇劇情點發展。

恒指收市跌455點，即係跌幅啱啱少咗一半，好多股亦從地獄底爬番上嚟，尤其單睇金飾鐘錶股仲以為係大升市添，六福（00590）、周生生（00116）同英皇鐘錶（00887）都升5%以上，師傅教落：升得愈高、跌得愈傷，但金飾鐘錶股炒到咁高PE仍然咁勇，賣金股都有得解釋，美金貶值所以金價升，金價升所以多人買金保值。

恒指收報20,490點，暫時保得住二萬關口，但中線仍然覺得凶險重重，今日內地公布嘅七月CPI，孖屐預期會比六月稍跌，不過已經唔係咁多人關注呢個消息，因為斷估祖國唔敢再加息住。孖屐最關注係明晚美國聯儲局議完息會唔會暗示QE3，QE3已經成為續命丹，古勝較為認同「基金教父」雷賢達嘅講法，注資只係將衰退期延後，勒緊褲頭先係根本解決方法。

港股成交仍接近千億，好多「烽煙」節目仲有唔少人問可唔可以入貨，但根據希臘同葡萄牙嘅經驗，意西嘅CDS會反覆不斷創新高直到要求救為止，古勝寧願睇定啲先，成世流流長，股票有排炒，至少減持波動大嘅短線投資組合，又或者沽番適量期指做對沖，而部分穩健型股票就唔少人趁低吸納，例如粵投（00270）、華創（00291）、瑞聲科技（02018）等。

沽期指做對沖未必適合二三線股，因為二三線股隨時大脫腳，好似尋日上晝有得買冇得沽，最惡劣嘅時候得廿幾隻股票升，成百隻狂插一成以上，到收市雖然已經冇咁慘，但全日仍有1,246隻股票下跌，國企指數跌321點亦跑輸大市，國指成分股全跌無一幸免。

港股朝早跌幅明顯多過日本、南韓同中國，但好彩收市收得遲人一兩粒鐘，食到歐洲嘅反彈浪，而滬綜同南韓咁啱都係跌3.8%，新加坡跌3.7%。

明豐短期或有動作

金飾股雖然逆市上升，但明豐珠寶（00860）仍跌6.3%，公司中午搞咗個「珠光寶氣」記者會，搵埋本地名模戴鑽飾行貓步，又有劉央撐場，原來早排入股嘅L Capital係LVMH旗下基金，仲話亨得利（03389）下個月有機會成為大股東。明豐下晝被瑞穗沽出10球貨壓住個價，但可以留意佢嘅動向。

今個月係放榜期，趁跌市可揀啲績優股吸納，尋日安踏（02020）同TCL通訊（02618）嘅業績都唔錯，TCL手機銷量增37%，盈利增56%，毛利率多1個百分點，證明做2G手機一樣有錢途。

古勝