一講起復星（00656），自然令大家諗起佢有個外號叫「上海和黃」，意思係以一個綜合式企業來擺陣。不過，好聽就叫做多元化，唔好聽就叫做「周身刀，張張弱」。係咁嘅環境之下，股價都無乜起色。
管理層覺得諗唔掂數，決定變身「上海巴郡」，向復星基金公司進發，又參考股神嘅價值投資法，希望可以低買高賣，甚至好似星爺話頭──上市分拆再分拆，幾咁厲害！
講真，和黃（00013）作為綜合式企業嘅典範就無容置疑，可惜復星「有其神無其精要」，即係執行能力有「丁點兒」問題，與其都交唔到功課，倒不如引用投資界法則──分散風險，成為一個DealMaker仲好玩。又直接，又實際，係咪？過去一年買咗24個項目，都咪話唔犀利！加上成功分拆國藥控股（01099）來港上市，海南礦業又係上海上市，又套現，成績「有目皆見」，最勁抽係主席過去由四月增持超過31次，約數係三日一次，主席即係主席，擁有別人「看不到嘅智慧」，佩服佩服！
各大行都全力「合奏」，對股價有一定支持。睇幾多好？我就會先以上市價9.23元為短途目標，睇吓盈喜嘅光環之下，有冇新驚喜。
香港大學電子金融服務榮譽助理教授 徐燦傑