絲絲講場：證券業協會群雄下月競逐主席
唔經唔覺，證券業協會主席李耀榮嘅兩年任期就快完結，需要「轉莊」，該會將於下周開會，定出下月選舉新主席嘅日期。
一般由副主席升任
根據過往慣例，證券業協會主席呢個位一般會由副主席升任，依家該會共有3位副主席，分別係嘉信控股董事及總經理馮煒能、招商證券董事繆英源及東英亞洲證券董事陳立德，邊個會「升呢」出任主席，抑或會「爆冷」空降出任，大家唔使等好耐，下月自會揭曉。
證券業協會係本地最大嘅證券經紀組織，不過近年風頭有被其他會蓋過之勢，因為論「出位」程度，佢哋肯定唔及以「示威」揚名、由王國安為首嘅證券及期貨專業總會；近年又有實力雄厚、迅速冒起嘅「生力軍」加入，即係中資證券業協會。此外，其他證券組織亦好積極參與業界關注嘅議題，好似近期業界非常關注嘅「黑池」事件，7個經紀組織就一齊討論，準備聯手向政府及監管機構施壓，增加聲勢。不過有證券界人士話，由於證券業協會始終係最大嘅經紀組織，政府仍然好重視佢哋嘅意見。
余絲韻