《福布斯》尋日發布咗「2011年中國上市公司CEO薪酬榜單」，已進入「高薪時代」嘅內地企業，近年多咗好多年薪過百萬元嘅CEO，人工最高嘅，係人都知道係中國平安CEO馬明哲，佢嘅年薪達987萬元人民幣，但若果同聯想集團（00992）CEO楊元慶嘅7,872萬元相比，相差成7倍呀！
根據《福布斯》嘅統計，內地企業年薪過百萬元嘅CEO共有232人，當中民企CEO比例仲未過半，榜首就係中國平安CEO馬明哲，排第二及第三位嘅係來自證券及銀行界，可見金融業喺高薪行業佔有「壟斷」地位。
至於華銳風電嘅總裁韓俊良，年薪都有858萬元，一啲都唔失禮。《福布斯》就話，剔除喺今年先至掛牌嘅華銳風電，攞到百萬元年薪嘅120名國企CEO，喺去年幫公司爭取到33%嘅營業額增長，以及47%嘅純利增長，明顯係叻過民企CEO。
之不過一拍埋喺香港上市嘅中資股，唔單只楊元慶贏咗幾條街，人和商業（01387）總裁戴永革嘅6,745萬元年薪以及恒大地產（03333）總裁夏海鈞嘅4,795萬元年薪，都令A股嘅CEO望塵莫及。
余絲韻