市場熱線：山水水泥逢低收集

依家個市風雨飄搖，隔晚ADR曾經跌500點驚心動魂，收市期指大低水179點，和黃（00013）成績表又略低過孖屐預期，恒指有機會下試21,509點嘅上次低位，但就算守得住，好多股已跌穿六月中嘅低位，國企指數亦穿咗萬二點呢個雙底，實際已係入咗熊市。

強勢股物極必反

尋日輪到強勢股被屠殺，包括財險（02328）、德永佳（00321）、英錶（00887）、東表（00398）、華晨（01114）及人和（01387）等，當強勢股亦冇運行嘅時候，個市相信會係咁先。以上各股未來業績都唔使懷疑，只係早輪資金一味追入呢類股搞到炒過龍，依家再一鑊熟。

古勝及時推介穩陣型嘅粵投（00270），尋日逆市升5.3%創新高夠晒搶鏡。同樣，新奧（02688）亦創新高，除咗花旗唱好之外，中國同俄羅斯傾緊賣氣協議，但雙方仲有排都未傾掂價錢。

暴跌股仲係成疋布咁長，下跌股數多過上升嘅兩倍，創52周新低有88隻。尋日較特別嘅係強勢股天能（00819）上晝突然跳水插13.3%然後拉閘。電池股呢輪集體炒起，原因都係話好多鉛電池廠要封艇。尋日理士（00842）跌4%，超威（00951）倒升3%，邊個得益、邊個蝕底只係靠估。

七大新興產業「十二五」規劃將會喺下月公布，但風電出師未捷身先死，國策五時花六時變唔好信到十足。另外，有消息話飛機製造升呢做國家戰略產業，預計未來二十年祖國對新飛機需求接近4,000架，消息應對中航科工（02357）有利，但尋日仍要跟住大市下跌。

價格屬正常回吐

水泥股另一類強勢「不再」嘅股，但中建材（03323）發完盈喜令氣氛有所好轉，其實七、八月不嬲係水泥業傳統淡季，太多落雨影響建築活動，水泥價格連跌5星期屬正常現象，但同舊年同期比仍係高好多，捕捉呢類周期性可以高沽低揸。

山水水泥（00691）尋日升2.2%收報9.68元，公司係祖國第3大水泥股，但孖屐對山水嘅估值就比海螺（00914）同中建材低好多，現價今年預測PE只係9.3倍。「美人」早排出報告，話山水今明兩年盈利複合增長達84%，遠高於行業平均嘅48%同海螺嘅56%，而明年預測PE得7倍，則遠低於同行平均嘅9.5倍。

山水水泥嘅基地喺山東同東北，屬於發展比較快嘅地區，唔單止山東水泥價升，遼寧水泥價亦每噸升到400蚊人仔，每噸毛利有100蚊人仔，比舊年多咗足足1倍，今個月派中期成績表之後，隨時有估值提升空間，趁股價調整可以吸納。

戰報

新奧能源（02688）

古晨又有好介紹，八月三日特別推介新奧能源，股價昨日逆市勁升，升至29.6元高位，賺近12%。

金蝶國際（00268）

古勝前日推介金蝶國際，股份連日上升，昨日裂口高開現突破，最高升至4.89元，累升逾11%。

古勝