絲絲尋日與內地前五大基金之一嘅博時基金（國際）行政總裁李鍇食飯，佢話佢哋公司好國際化，總部開會時要用兩文三語溝通，事關有啲人淨係識講英文，又有廣東人及國語人咁，佢自己有時仲要做埋翻譯，不過公司就一個洋人都冇喎。絲絲心諗咁神奇？因乜解究一個洋人都冇，都叫做好國際化？
李鍇話，雖然成間公司都係華人，但有好多係abc，連中文都唔識講，成個集團海歸派佔咗兩成，仲有佢哋所有嘅Fundman都要有碩士學位，當然亦有唔少擁有博士學位嘅管理層啦。至於佢自己就係廣州人，喺內地讀完書後又出過國，算係內地第一批海歸派，佢曾經喺Citi私人銀行、E.J.McKay & Co及INVESCO等工作，資歷認真唔簡單。
點解博時要咁國際化呢？李鍇話佢哋睇好未來中國嘅投資及人民幣市場，所以要擔當國際投資者投資中國嘅橋樑，以及內地投資海外嘅窗口。
（余絲韻）