市場熱線：江銅佳績可期

港股挾上主要靠內銀同電訊股，先講內銀股，下個月派成績表可以寫包單一定靚過班港姐，至於地方債務同高鐵債務點埋單就年尾先算。而祖國三大電訊股炒乜呢？咪又係「哎瘋」！未有哎瘋嘅祖國移動（00941）同中電信（00728）博就快有得賣，聯通（00762）則望遲啲有哎瘋第5號，阿爺自己開發TD技術結果仍係被美國科技拖住鼻子走。

成績表好壞有樣睇

藍籌股最弱仍係中石油（00857）同港鐵（00066），港鐵請咗個慳錢高手做新CEO，但股價仍冇起色，主要係孖屐對兩個禮拜後派嘅成績表不寄厚望，原因係冇乜賣樓收益入帳，但派完成績表應該可以趁低吸納。業績期臨近，應揀番啲業績好嘅股同埋迴避業績差嘅股，而春江鴨亦會有動作，北控（00392）呢排股價冇厘精神，成績表都唔慌好。

高鐵股有反彈有尋底，中國自動化（00569）一升就有近13%，競爭對手出事，會唔會對佢因禍得福呢？依家都係靠估，但南車兩母子（01766及03898）同「兩鐵」則肯定有排煩，尋日較特別嘅係中鐵（00390）升但中鐵建（01186）跌。有人已經驚定保障房，祖國咁多豆腐渣工程，保障房亦係低毛利生意，所以唔驚就假。有深圳樓盤傳出減價消息，但內房股仍係有心有力。

高鑫（06808）今日卒之可以上市，暗盤價高15%咁多。「哎幫」亦皆大歡喜，認購44萬以下嘅申請可以攞到足，如果未來三年通脹企喺5%樓上，買哎幫都幫得手。雖然美國暫時睇唔會有QE3，但美金已經積弱難返，通脹都會繼續處於高位，冇買哎幫就最好買啲金屬股對抗通脹。

預測PE10倍唔夠

古勝話呢排要買啲預期績優股，其中一隻係江銅（00358），前排已發咗盈喜預計上半年可以賺多一半以上，公司首季已賺15.87億人仔，半年最少賺31.86億人仔，即係次季賺得唔少過首季，以次季平均銅價稍跌嘅情況計數，江銅次季表現合格有餘。隻股尋日股價再創52周新高收報28.05元，但往績PE仍係14.6倍，今年預測PE會落到10倍樓下，估值仍然偏低。

年初時國際銅價曾衝破每噸1萬美元，尋日倫敦交易所期銅價格仍維持喺9,785美元，銅價唔似金價咁屢創新高，亦唔似棉價咁大上大落，對冶煉商來講反而更加好。睇好銅價並非事後孔明，舊年已有分析話今年銅會求過於供，祖國積極提高銅庫存，對銅價亦有支持。江銅今年增加自有礦山產量，目標提升到20萬噸以上，增產加埋銅價長居高位，如無意外今年可以繼續跑贏大市。

戰報

大慶乳業（01007）+13%

小尾上周二睇中剛易名的大慶乳業，當日推介時低位見2.34元，昨日高見2.65元，賺逾13%。

中國水業（01129）+20%

古晨前日點題中國水業，此股爆發力有睇頭，以兩日股價高低位計算，升近兩成。

古勝