絲絲講場：雪花啤貓仔變老虎
絲絲與華創（00291）嘅老友傾開偈，佢話喺華創前主席寧高寧「揸弗」年代，即係華創剛進軍內地啤酒業之時，雪花有26間廠，寧總當時將之比喻為26隻貓仔，與當年中國啤酒「一哥」青啤（00168）比較，真係有如大老虎同貓仔，冇得揮。
寧高寧領軍居功
十幾年過後，華潤雪花呢批貓仔繁衍到依家已有70隻，仲要唔係貓仔，而係變成雪花大老虎。老友話，將雪花比喻為大老虎係有道理o架，事關呢十幾年嚟，佢哋透過購併重組不斷壯大公司規模，強化銷售，更加喺○五年以158萬噸嘅銷量，成為全國銷量第一嘅啤酒品牌，青島都要屈居喺佢哋之下；○七年佢哋更獲國家工商行政管理總局認定「雪花」係中國馳名商標添。絲絲相信，當初帶領華創進軍啤酒業務嘅寧總，見到雪花呢隻由佢一手培育嘅貓仔發展得咁好，一定感到好欣慰。
余絲韻