絲絲講場：太極虎怒撲冼博德
渣打集團（02888）旗下嘅渣打韓國第一銀行罷工至今已歷時四星期，管理層好似搞極都搞唔掂班員工，不但42間分行暫時停業，渣打仲要請班客仔搭的士，等佢哋可以去第二間分行處理自己嘅財務。雖然渣打喺本周四已表態有得傾，不過絲絲收到風，4位工會代表將會喺今日飛去倫敦，與渣打集團行政總裁冼博德直接攤牌講數。
點解今次罷工搞出個大頭佛？據工會領袖Kim Jae-yul解釋話，韓國好多銀行一向都係以年資去決定薪酬，根本唔可能一如渣打提出薪酬與表現掛鈎，但渣打就認為前者做法會對盈利有壞影響。
工會領袖怒斥「元兇」
絲絲有啲擔心，因聽聞Kim先生喺罷工誓師大會上好鬼激動，揸實個拳頭大大聲話冼博德係今次罷工嘅元兇。佢仲話冼博德完全冇文化敏感度，一啲都唔了解韓國嘅職場文化。
其實韓國呢啲工會真係好興搞越洋罷工抗議，好似喺早幾年，韓國其中一個工會就去咗上海汽車工業抗議，聽聞搞到班內地人嚇破膽，之後又有另一個韓國工會去咗印尼真奈嘅一個工廠，為嗰度嘅韓國工人爭取承擔管理權，認真唔講得笑。
余絲韻