絲絲講場：財資市場公會 推全新資歷架構
金融機構一向好講求資歷架構及認可，隨着市場要求愈嚟愈高，金管局牽頭成立嘅財資市場公會（TMA）有新搞作，今日將宣布推出《行為及常規守則》及新專業資歷架構，仲希望架構影響力最終好似香港證券專業學會個考試咁大。
信銀國際財資部執行副總裁兼司庫陳鏡沐（Woody）喺財資界打滾多年，近排佢仲履新成為TMA理事會成員，兼任財資市場公會事務委員會成員，佢話希望透過推動TMA旗下嘅全新專業資歷架構，提升行業水平。
三級制考試每年兩場
Woody話，呢個新舉措係想提倡TMA嘅會員資歷架構邁向標準化，以三級制輔以相應嘅考試，而唔同級嘅考試就每年都會舉行兩場。TMA嘅第一級考試已推出，由TMA與香港公開大學合辦，Woody仲預告第二級考試由TMA與香港大學校外課程合辦，即將推出，TMA專業資歷架構嘅最終目標，係擁有好似香港證券專業學會對證券市場從業員咁強嘅影響力。
余絲韻