本港樓價貴到飛起，內地豪客又起勢掃貨，本地樓仲抵唔抵買就見仁見智，不過向來投資有道嘅鄭裕彤（彤叔），佢手頭上儲落嘅中港投資項目多不勝數，家陣佢似乎有意另覓戰場，瞄準海外物業發圍。「彤叔」喺上月透過其私人持有嘅周大福，搵咗一間英國公司Pinnacle Regeneration Group「試水」，特別嘅係呢間公司唔係Sell豪宅，而係Sell較廉價嘅保障房。
呢個消息來自彭博社，絲絲有問過周大福嘅發言人，佢話暫時冇乜回應。其實周大福水源充足，自然想投資新項目「錢搵錢」啦，加上「彤叔」對於投資「磚頭」駕輕就熟，話唔定就係因為咁而留意到英國房地產市場；咁啱又遇上英國政府為咗實施削減開支嘅財務計劃，去年首次容許投資者參與公屋計劃嘅大好獲利時機，「彤叔」於是夥拍另外兩位香港投資者，以3,000萬英鎊收購Pinnacle共61%股權，進軍英國保障房市場。
聽聞英國保障房制度與香港幾似，都係以低於市場價嘅租金，租畀啲低收入市民，差額由政府補貼，依家有近180萬個家庭排緊隊等上樓。喺英國管理近22,000套住房嘅Pinnacle話呢類投資回報唔錯，未來3至4年嘅投資計劃一大籮，今次由「彤叔」牽頭嘅投資只係一個開始，唔少投資者都想分一杯羹。
余絲韻