市場熱線：港燃上車唔怕遲

恒指挾上主要靠隻祖國移動（00941）升3%，啱啱公布嘅六月上客數字理想，到暑假多咗學生哥出電話，所以估計上客量會持續上升，加埋下個月會派成績表，所以短線呢隻幾穩陣。內房股連續兩日做好，古勝話過大戶儲咗年幾貨，等風聲冇咁緊就會再郁手，果然反彈得夠快。

電腦科技股有睇頭

尋日係反彈市，連跌到殘嘅思捷（00330）亦回升3.5%。好多隻前日被隊到甩轆嘅股都大幅反彈，例如光大國際（00257）、瑞年（02010）、寶姿（00589）等，奕達（02662）發完盈警創新低再倒升5.5%，青蛙（01259）變番王子，朝早創2.12元上市新低之後倒升到2.38元收市。

蘋果公司成績表超勁，帶挈香港上市嘅瑞聲（02018）、偉仕（00856）同聯想（00992）亦做好，其實同電腦科技有關嘅股都唔錯，包括瀚宇博德（00667）、神數（00861）、金蝶（00268）等。前日祖國亦公布調查報告，網民截至六月底較半年前增加6.1%，增幅其實放緩，但寫微博嘅就爆升兩倍，達到接近兩億人，即係10個網民當中有4個寫微博，反映祖國網民特別多作家，最受益嘅係納指上市嘅新浪，但QQ（00700）亦積極爭緊呢個孖屐。

雖然唔少超跌股反彈，但亦唔少基金股加入洗倉行列，尋日輪到安徽皖通（00995）、信義玻璃（00868）同德昌（00179）等，得人驚嘅地方係唔知幾時時辰到，呢排好多大行最鍾意「殺價」，將目標價㩒到地底泥，但國美（00493）算係奇葩，有德銀唱好並預測上半年賺多三成，所以尋日創下3.6元新高。

古勝日前推介昆侖能源（00135）時話過，阿爺下半年會搞水電油氣價格機制改革，相關股份其實已跑贏大市，而燃氣自從舊年中天然氣加價25%之後，民用燃氣一直拖住加價，燃氣股要硬啃差價好蝕底，但限制有機會鬆綁。依家最主要問題係同俄羅斯嘅供氣合約仲未傾掂，俄國佬獅子開大口，祖國要大力發展燃氣，惟有盡快同國際價格接軌。

憧憬母公司續注資

古勝依然對燃氣股前景好有信心，除昆能外，隻港華燃氣（01083）係冷門嘅選擇，平時成交唔多，尋日有4球成交算唔錯，舊阿媽威華達（00622）仲揸住近2億股可隨時沽出，但孖屐對於呢方面未驚過，相信大把人願意接貨，皆因燃氣股最值錢嘅係網絡，一個地方只可以插一支旗，而以祖國嘅發展速度，插咗旗就係神仙。

港燃有阿媽煤氣（00003）射住，經常有注資憧憬，而公司喺內地亦穩步發展，今年頭四個月天然氣銷量升咗兩成，今年會發展8個新項目，長線投資有得諗。

戰報

中金再生（00773）+9%

股博士睇中隻中國金屬再生資源，七月十三日低位9.41元，昨日高見10.22元，咁就執到近9%。

TCL多媒體（01070）+8%

古晨七月六日睇好TCL多媒體，其後炒上，因業績轉好發盈喜，昨升至3.33元高位，升近8%。

古勝