唔少人畢業後都喜歡組織同學會，方便日後聯絡，甚至可以喺事業上幫上一把。一班工商界專業人士喺幾年前去北京上國情班，修讀中國國家行政學院為期一周嘅課程，後來修讀人士愈嚟愈多，於是就喺今年五月八日成立咗國家行政學院（香港）工商專業同學會。
呢個同學會尋日舉行首次研討會，同學中不乏知名人士，包括李嘉誠基金會董事洪小蓮、民豐企業（00279）主席楊梵城、中銀國際副執行總裁謝湧海及證券學會會長李細燕等，其中謝湧海及李細燕更加係副主席。
首任主席係證券業協會前會長李耀新，佢話國家行政學院屬省部級培訓機構，係研究中央政策嘅基地，有唔少高官喺學院培訓，○八年工商界亦返去學習。成立同學會嘅目的係希望集合一班工商界專業人士，將來為一啲政策發表意見，依家已有4屆畢業生，第5屆亦即將畢業，共有百多名會員。
絲絲冇見洪小蓮一排，見佢風采依然，佢近期都係忙於公職，出席研討會之前剛啱喺房協開會。至於謝湧海，佢本身應該已好熟國情，點解仲要修讀課程？謝總話課程涉及範圍好廣，包括金融、經濟、軍事及政治等，睇嚟大家都覺得呢個課程好受用。呢個課程每年辦兩屆，想讀就要快報名，但要有人推薦至得喎！
謝湧海尋日擔任演講嘉賓，講「人仔」國際化嘅商機，有人問佢QE3，係咪應將手上港元換成人仔？佢話相信美國會繼續印銀紙及發債，美元貶值，而港元跟美元掛鈎，但係咪要將港元兌換人仔就要自己判斷喇。
余絲韻