市場熱線：新創建防守力強

雖然指數反彈，但二三線股連日被洗倉，尋日洗得仲勁過前兩日，最惡劣時候二三線股10隻跌咗9隻，到尾市先跌幅收窄，中芯（00981）再插12.28%，博耳（01685）展開第二輪跳水，隻「田雞王子」（01259）喺水底愈潛愈深，第三日上市即跌7.4%；連以穩陣見稱嘅中通服（00552）亦跌到4蚊邊，今年成績表應該唔差嘅光國（00257）則跌5.4%，芬佬明顯係要錢唔要貨。

大戶行動唔易捉路

有分析話依家對沖基金揸重現金，如果有乜風吹草動（例如美國提高債務上限獲通過），芬佬蜂擁入貨嘅話，個市會挾得好犀利，但最驚二三線股未等到黎明已被震走。

不過，另一方面大戶玩實則虛之、虛則實之，先係資源稅話會擴展到煤炭業，但煤炭股反而升喎。招行（03968）宣布供股，內銀股亦照升。最勁都係內房股，尋日報復性反彈，話歡迎人哋沽空嘅恒大（03333）勁升7.3%，主要係孖屐估計中央嘅二三線城市限購令未必會太狠辣，否則地方政府靠土地去做抵押借錢，房地產唔掂可能會搞冧錢莊。

滬綜指就偏軟，滬綜指跌0.7%失守2,800點關口，同港股一樣，水泥股跌而煤炭股升，內房亦係絕地反擊，但內銀A股則跌。阿爺今次搞二三線城市限購令隨時兩面不是人，太手緊搞到樓市崩潰就好大鑊，但如果太手鬆，炒家覺得政府冇料到就會炒得更狼，所以要放長雙眼睇佢點做。

載通（00062）尋日發盈警，話油價大升拖累上半年要見紅，九巴加價都要蝕錢，咁樣新巴冇加價豈非蝕得更慘？但新巴從來冇詐型，最重要係經營有道。講起新巴，亦不得不提佢阿媽新創建（00659），呢隻亦不嬲係穩陣股當中不二之選，喺近期左揀右揀都唔對路之時，買呢隻起碼有揸拿。

業務多總有幾瓣好

穩陣嘅原因係公司業務多元化，依家潮流興業務精簡，但多元化嘅好處係自動分散風險。以新創建為例，業務包括建築、基建、會展中心、水電、交通運輸等，啱啱仲分拆咗鐵礦石業務嘅新礦資源（01231）上市。

每個經濟周期都有部分行業較好、部分較差，好同差可以互相抵銷，令盈利表現比較穩定。好似香港建築工程呢幾年都會幾好景，但祖國公路同電廠則可能較差。

新創建除咗協興建築、會展中心同新巴之外，近年業務發展集中喺祖國，上月中又以17.7億銀買咗條杭州公路權益，當然祖國嘅發展空間大過香港好多，而最新業務係鐵路集裝箱中心，18個站陸續落成，到今年就功德圓滿，而且亦開始轉虧為盈，相信未來會對集團有唔小嘅貢獻。新創建勝在防守力強、息率高，呢排買股亦要保守啲。

戰報

中國龍新能源（00395）+10%

中國龍新能源日前大發神威，昨日市況波動仍然企穩，古晨前周五已作推介，當日低位0.73元，升足一成有多。

古勝