絲絲講場：AXA安盛慶祝正名
相信大家對「AXA國衞」唔會感到陌生，不過以後大家就要改口，因為佢哋宣布改名為AXA安盛。AXA安盛尋日就舉行慶祝儀式，行政總裁夏偉信就講笑咁話，佢準備咗好多新卡片，要重新派畀每一個人。據聞為籌備今次改名，AXA安盛準備咗超過半年，唔單只公司名轉咗，就連佢哋喺灣仔嘅大本營國衞中心，亦改名為安盛中心。
對購併抱開放態度
其實今次改名都係意料中事，事關AXA喺香港產險方面嘅子公司一向叫安盛，但主打壽險嘅就叫國衞，搞到兩者好似冇乜關聯咁，加上喺今年四月時，本身持有AXA國衞超過五成股權嘅法國AXA集團，向澳洲股東收購埋剩餘股權，所以AXA安盛重新打造中文品牌，可謂順理成章。
既然股權集中咗，AXA又會唔會好似友邦、保誠咁，喺香港上市集資呢？AXA亞洲區行政總裁白素輝同絲絲講，話暫時冇咁嘅計劃喎，不過佢哋對於購併就抱持開放態度。
余絲韻