絲絲講場：證監傳中環搵新竇
雖然早前有消息話，政府屬意將證監會、港交所（00388）等金融機構搬去擬重建嘅中區政府合署西翼大樓，打造為超級金融大廈，但由於大樓重建仍有爭議，且興建需時，為解決證監會現有Office租約就快滿嘅燃眉之急，有中環友話，證監會近期喺中環物色租用Office，當中包括中環長江中心。證監會發言人對於係咪喺租約滿後搬去長江中心，就話唔會評論。
等候進駐合署西翼
證監會現時有兩個Office，一個位於遮打大廈，將於二○一三年約滿；另一個位於李寶樁大廈，喺今年底就約滿。市傳遮打大廈大業主會喺約滿後，唔再續租畀證監會，所以證監會要「搬竇」。證監會一直希望將兩個Office搬埋一齊，可以方便做嘢及溝通，但要喺中環搵一個面積大嘅Office，話咁易咩？仲要考慮埋租金因素。
所以話，如果超級金融大廈快啲起好，證監會就可以搬入去，雖然中區政府合署西翼大樓重建係會賣畀私人發展商作商業用途，證監會作為租戶，一樣要畀市值租金，但起碼地方夠大，唔使驚地方唔夠使！
余絲韻