市場熱線：昆能係時候上車

今個禮拜好似冇乜消息，美國得房屋數據，提高債務上限隨時拖多個禮拜；A股亦係牛皮，二三線城市限購令已成定局，依家等緊新名單有幾多個城市，內房股連跌三日，但個別有反彈；最衰都係航運股，升冇份、跌就有份，日日創新低。金價升穿1,600美金創新高，但金股只得紫金（02899）有得升，招金（01818）同靈寶（03330）亦要跌。

個別中資股唔抵爭

每日都有基金股被洗白白，尋日最慘係中芯（00981）同中信泰富（00267），雖然死因好明顯，但呢排隨時將壞消息放大。「木滴」插完紅旗之後，惠譽加多腳，話35隻中資股或面臨集資困難，包括玖紙（02689）同保利協鑫（03800）等。咁樣唱法，唔困難都變困難啦！

不過，個別中資股管治水平又真係得人驚，藏水（01115）上市得十零日，但已爆出最大客戶買水少咗三分之二，咁都得？隻股單一產品、單一客戶好大風險，奇在尋日隻股先跌後回穩，收市僅跌3仙。

「哎幫」今日中午就會截止認購，古勝冇用開錢莊投資戶口，新開戶手續麻煩，而透過證券行認購又多雜費，每年收雞碎咁多息已唔見一截，所以決定唔認購。「哎幫」主要係跟通脹，如果閣下認為未來三年高通脹就買得過，照計最低工資因素未完全反映，所以通脹預期仍係好高，但問題係「哎幫」分得太少，唔夠買膠布。

古勝有幾隻「長青股」，喺市況淡靜時就發揮作用，例如一拖（00038）、昆侖能源（00135）同雨潤（01068）等，可惜後者畀空軍搞到元氣大傷，需要時間復原，而一拖同昆能繼續保持鐵股本色，昆能已連升四日，但每日都係細細步，睇嚟未來都係保持穩步上升格局，值得長線持有。

民用燃氣有望提價

昆能宣布收購北京燃氣之後靜咗一排，但查實買北燃單「刁」仲未落實，暫時公司仲係以開採石油為主要收入。昆能除咗等注資之外，未來會大力發展LNG（液化天然氣）業務，今年資本開支達百億人仔，管理層話LNG氣站仲好賺過燃氣。

其實燃氣股呢排走勢幾硬淨，自從舊年中天然氣加價25%之後，本來民用燃氣會跟住加價，點知通脹勢兇夾狼，結果民用燃氣拖到依家都未有得加，好彩工商用燃氣加價補數。不過，阿爺對下半年控制通脹好似已成竹在胸，食用油喺上月尾已限價解禁，早排亦話水電油氣會推行價格改革，睇落燃氣可「追回」差價有望，對燃氣股係一個可以落鑊嘅消息。

戰報

一拖（00038）+10%

小尾上周二推介一拖，當日低位見過9.7元後，昨日逆市再升，最高見10.62元，若食盡高低波幅可賺近一成。

古勝