孖妹缸湖遊：變種QE是吉是凶？

猶記得孖妹喺兩周前，先至與次輪量化寬鬆政策（QE2）講完拜拜，點知伯老前幾日暗示會再買資產刺激經濟後，跟住又話依家未係時候，佢個人真係反覆，完全估佢唔到。我哋與有「聯匯之父」之稱嘅景順投資首席經濟師祈連活傾過偈，佢話如果想靠QE去解決美國根本嘅通縮問題，睇個勢我哋仲要經歷多幾輪量化。

恒指喺QE1推出時愈升愈有，到QE2時反而由高位回落，唔通QE對股市嘅影響係驟晴驟暗？伯南克之前提到嘅刺激經濟措施可能會變種，招數可能包括明確解釋會維持低息環境幾耐、進一步維持低利率，又或者重啟買債程序，增加長年期債券比重。

金道投資（香港）首席投資總監 鄧偉基 港股借內地財策炒上

祺祺： 雖然伯老突然反口話唔推QE3住，但美國經濟咁差，睇嚟都係事在必行，到時港股會有乜反應？

　鄧： 港股喺金融海嘯後強勁反彈，○九年全年暴升逾50%，反映QE1有效刺激港股升勢，但之後嘅QE2規模就細好多，港股同期反而冧咗。其實喺兩次QE推行期間，內地進一步收緊貨幣供應，M2增長率由29.7%高位回落至上月嘅15.9%，縮咗成一半，QE2對港股嘅催化作用真係個問號。如果QE3真係出台，會刺激整體大市氣氛，但未必會利好個別板塊表現，恒指反而更受內地貨幣政策左右，例如近期對經濟狀況較敏感嘅消費股、汽車股、內房股及水泥股都受帶動，當中華晨中國（01114）上周高低波幅逾10%，睇番成交及走勢，有機會攀升至11元。

高妹： 我哋有乜準備？使唔使掃定貨呢？

　鄧： 恒指依家已回落到大半年以來嘅低位，若企穩後，美國經濟數據繼續疲弱，就會觸發市場對QE3出台嘅預期，如果中國同時終止緊縮貨幣嘅政策，港股可能會喺兩個利好因素配合之下大幅反彈。資金實力雄厚嘅投資者可以嘗試喺現水平入市，不過記得要喺恒指低見21,500點時止蝕。

恒生投資服務有限公司首席分析員 溫灼培 美元難彈利商品貨幣

祺祺： 若聯儲又買債，美匯係咪冇運行？

　溫： 美匯指數應該會橫行，美國經濟差，誘使投資者增持美元，會令美匯轉強；但與此同時，市場期望美國可能會推QE3，加上QE2資金仍喺市場浮游，係對美匯不利嘅因素。至於歐元匯價就會喺1.4至1.47美元上落，如果太高會影響經濟，太低又會造成入口通脹，唔符合經濟利益，到時可能導致歐洲央行要再加息。澳元上半年創嘅1.1水平應該會係今年高位，投資者應等到回落至1.04先吸納。

高妹： 有乜嘢貨幣值得留意？

　溫： 美國經濟會否好轉係未知之數，但依家當地數據差係不爭事實，令整體投資環境轉差，如果推出QE3，對經濟帶嚟刺激一定少於QE2，但對投資市場嘅影響又係另一回事，到時美元更加唔值錢，所以資產價值會提升，商品貨幣匯價又有機會向上突破，當然對匯價爆炸力嘅影響會細過QE2啦。

交通銀行香港分行首席經濟及策略師 羅家聰 物價續漲 金銀當炒

祺祺： 你睇兩次QE嘅推行時間，與坊間分析有啲唔同，港股走勢與QE推行時間有乜關連？

　羅： 我認為QE1喺○九年三月十八日開始，至去年六月二十三日結束；QE2自去年十一月三日開始，至今年七月六日終結。QE推出後，港股走勢冇既定方向，冇話一推就升，就算市場資金氾濫都要睇埋經濟基本因素。好似○九年推QE1時，經濟基調好轉，美國樓市開始升，支持股市向上，資金充斥就進一步推波助瀾；但去年環球經濟見頂回落，股市與經濟走勢好脗合，畢竟「股市睇盈利，盈利睇經濟」，恒指走勢及經濟增長只係有一、兩季時差。你睇日本由○一至○六年推行咗幾輪量化，對股市都冇乜推動力，依家出現歐債、美債及日本地震問題，就算有錢都未必會買風險資產，反而物價就會照升。

高妹： 物價照升，係咪即係話商品買得過？

　羅： 金銀價格會單邊上升，呢啲情況就算唔推QE3都會出現，只係如果有新一輪政策出台仲會升得快啲。因為市場資金過剩，金價與通脹一樣仲未見頂，金價依家可能只係行到升軌嘅一半多啲，未來會見2,000美元，但要經歷調整後先會加快升速。銀價通常喺貴金屬周期尾段會追得好快，就好似二、三線股咁，但股市差唔多到頂先畀人炒上，依家都儲得過。

恒指年內恐跌穿2萬

祺祺： 商品貨幣又係咪抵買？

　羅： 美匯走勢取決於美債與歐債相對嘅嚴重性，唔會單邊上落，貨幣就會各自炒作。美匯升唔到上去，商品貨幣就好難因拆倉冧市，我睇好澳元未來6至12個月走勢，可能會上望1.2美元，但之後會喺高位回落。

高妹： 你依然本着一貫「港版末日博士」作風唱淡後市，何解呢？

　羅： 港股嘅技術走勢及基本因素同樣欠佳，亞太區樓市都唔對路，恒指可能未到年尾就會跌穿20,000點喇。

26.2%人估恒指跌穿2萬

市場擔心歐債危機蔓延至意大利，加上內地通脹失控等利淡消息，令港股急挫。你點睇恒指今輪跌浪嘅最低位？據《東方日報》網上民調截至上周六晚上6時嘅結果顯示，有49.4%人估計恒指可守住21,000點關口，12.8%人認為會跌到20,501至20,999點，11.6%人料跌見20,000至20,500點，其餘26.2%人就估會跌穿20,000點。

（高妹）（祺祺）

若有料報畀高妹同祺祺或有嘢問，可電郵money.biz@opg.com.hk