市場熱線：中聯重科值得跟進

恒指可能短期上落唔大，但洗倉股洗到股民暈陀陀，創52周新低嘅股票日日都唔少。呢排都冇乜股票稱得上穩陣，炒來炒去都係水泥、汽車同鐘錶股，但隨時好似內房股咁樣急回就走唔甩，尤其水泥股，二三線城市一限購就可能會令建築動工量。

恒大老細有吉士

阿爺又出「限購令」，今次郁埋二三線城市，升咗半個月嘅內房股連續兩日回吐，恒大（03333）做咗「內房王」差不多全部靠晒喺二三線城市發圍，但喺其他內房股都跌嘅情況下，隻股竟然臨尾倒升2.8%收市，沽空亦佔成交兩成有多，但佢個老細話明歡迎沽空，唔通咁快就挾班空軍？

個市雖然只係跌幾十點，但唔少股份跌得好肉酸，兩隻風電設備股金風科技（02208）同中傳動（00658）愈睇愈眼冤，博耳（01685）發完通告澄清兩日後又再跌過，瑞年（02010）不明不白再創52周新低；仲有隻李寧（02331），穿埋9蚊問你怕未？最離奇係中通服（00552）無端端插6.15%，呢隻股不嬲穩穩陣陣，PE又唔高。

講吓上升股份，升得靚又有成交嘅主要係達芙妮（00210）同古勝啱啱推介過嘅南航（01055），達芙妮公布次季同店銷售增長達32%，睇落升得好合理，但點解首季同店銷售升得1%，次季又會咁懸殊呢？「田雞王子」（01259）鍾意喺水下面生活多過喺陸地，一上市就潛水，但睇PE其實幾吸引。高鑫（06808）好搞笑，連每股盈利都錯到離譜，搞到要押後上市，但依家押後上市唔興退飛，改為由申請咗嘅股東確認是否繼續認購，保母相信要上身，今年遠大（02789）同光纖網絡（03777）都要股東確認，但上市後股價表現只係麻麻。

增長步伐未放緩

上市年幾嘅國際煤機（01683）有鬼佬公司高溢價提全購，顯示機械行業比預期值錢，但呢單「刁」並冇刺激其他機械股，淨得中聯重科（01157）因發盈喜而升0.88%，公司預期上半年會賺多80%至110%，每股盈利0.68至0.78人仔，咁計法佢嘅預測PE咪好低？

中聯重科前排畀大行唱佢增長放緩，一度跌到近12蚊，跟住好快回升，依家發埋盈喜證明公司增長並冇減慢，大行報告未必信得過，更令人懷疑係咪特登唱淡等自己入平貨。其實中聯重科有唔少可炒概念，除估值偏低外，工程機械「十二五」規劃就快出台，而喺祖國同佢鼎足而立嘅三一重工同徐工都排住隊今年來港上市，隻股估值好有參考作用，所以股價唔會差得去邊。

戰報

味千（中國）（00538）+13%

味千上周尾段勁升，古晨前周一已叫大家留意，當時低位15.46元，同上周五收市價比較升逾13%。

南方航空（01055）+15%

航空股一飛沖天，帥哥上周二推介隻南航，話咁快已升至上周五高位4.95元，較其推介時升逾15%。

古勝