自言有35年「煙齡」嘅中糧集團董事長寧高寧，終於喺去年戒煙，令佢有少少「改邪歸正」嘅感覺，佢戒煙嘅理由都特別過人，並唔係有人逼佢，又唔係話健康出現咗問題，佢話只係因為「面子」而戒煙。
寧總話，依家時代唔同咗，呢幾年佢覺得食煙係一件愈嚟愈唔合潮流嘅事，無論喺餐廳、機場或會議室，煙民成日都會畀人眼超超，好似食煙已經成為咗被人歧視及令人討厭嘅事。
有一次寧總見到某間公司嘅廁所，門外除咗有廁所兩個字之外，後面仲加咗個括號寫住「吸煙室」，佢先至開始明白吸煙已畀人視作係一件唔乾淨嘅事，佢於是把心一橫決定戒煙。
寧總又話，戒煙對佢嚟講都唔算好難，因為佢係一個好着重「面子」嘅人，講得出就會做得到。有個朋友唔信佢會戒煙，仲挑戰佢話：「如果你戒到煙，我就戒食飯」，就係咁，寧總話自己好似上咗跑道嘅運動員，無後路可退，所以堅持到底戒煙。
不過佢都有段時間因為戒煙而搞到脾氣好差，好彩啲同事十分體諒佢，依家佢話自己已經喺一個唔同空氣嘅空間中生活喇！
（余絲韻）