設立科研中心
比亞迪將電動車引入香港市場已部署咗一段時間，王傳福話決定到科學園設立科研中心，係配合集團喺右軚版本電動車嘅發展，仲想透過香港打入國際市場。咁香港幾時有比亞迪電動車？佢話下半年會先喺香港推出幾十架電動車，待研發中心正式運作後，仲會有更多車款登場，當中將包括電動巴士及的士。
投資者近期好關心比亞迪嘅銷售唔多好，王傳福尋日解釋話，內地汽車補貼喺上半年完結，無可避免對內地車市帶來打擊，佢相信下半年汽車銷售會回升。不過投行瑞信就唔係咁樂觀，仲出報告指睇淡比亞迪嘅前景，又話其死敵郭台銘嘅鴻海喺大陸投資鋰電池業務，將對比亞迪構成威脅。睇嚟王傳福要挽回投資市場信心，實在唔容易。
余絲韻