早前畀渾水研究搞到雞毛鴨血嘅綠森集團（00094）母公司嘉漢林業，喺對沖基金飽食遠颺後，開始要「補鑊」以挽回市場信心，所以安排咗喺本月中搞個分析員考察團，去雲南視察佢哋嘅林木場，無非係想用事實證明佢哋嘅業務係實實際際嘅，點知突然又話取消，絲絲睇到都打個突。
由於市場信心嚴重不足，呢個消息令嘉漢股價喺周三又跌一成，連累埋綠森股價尋日一度跌6.7%，其後跌幅收窄至3.7%，收報1.28元。
睇番嘉漢畀投資者及分析員嘅信函，公司解釋話要等獨立調查委員會出報告，因為好多跟進嘉漢嘅分析員喺調查報告出爐前，都唔可以再公開評論佢哋，而委員會可能仲要2至3個月時間完成調查。
嘉漢喺渾水搞佢之後，委任普華永道會計師行成立獨立調查委員會，有個原本跟團考察嘅多倫多Matrix Fund基金經理話，考察團押後增加咗不確定性，言下之意即係暫時都唔敢買呢隻股票。
絲絲睇番時間，考察團喺六月六日即係嘉漢股價首日暴挫嘅翌日宣布搞嘅，到依家都發展咗成個月，臨出發先至發現問題，絲絲就覺得公司如果做好啲，與分析員多溝通，其實應該可以避免呢啲尷尬場面。
余絲韻