依家啲人寫微博原來鍾意講人哋嘅嘢，好似中國移動互聯網產業聯盟常務副理事長李易喺前兩日爆料話，鴻海集團董事長郭台銘及騰訊董事長馬化騰喺本周一好低調咁會面，亦係佢哋兩人首次見面添。
李易冇講到兩人會面嘅詳情，只係話雙方就當前全球業界嘅形勢，好廣泛咁交流吓意見。最抵死嘅係話兩人喺好多問題上「達成共識」，喺呢度「省略一萬多字」。一個係全球最大嘅專業電子代工廠老闆，另一個係中國互聯網巨頭之一，佢哋會擦出乜嘢火花就要遲啲至知。
雖然話郭台銘及馬化騰係首次碰面，但兩人其實好有緣。前年佢哋一同被內地《ＩＴ時代周刊》選為「○九年ＩＴ十大爭議人物」，去年兩人又當選十大「二○一○年中國財經悲情人物」，郭台銘旗下富士康發生咗令人震驚嘅員工「十三跳」系列事件，而馬化騰就因騰訊與360掀起一場罵戰而上榜。
呢兩位名氣響噹噹嘅企業家都咁身家豐厚，內地網民就好關心佢哋邊個有錢啲，你哋又點睇呢？
余絲韻