香港甲級商廈嘅樓價及租金不斷上升，但仍有唔少機構爭住搶租，中環可以話已經插針都插唔入，即使爭得到，租金亦貴到飛起。按揭證券公司尋日就召開咗董事會，絲絲八到會上有討論按證辦公室嘅選址問題，話唔定會因為租金貴而搬竇。
按證公司依家租緊國金二期做Office，董事會就討論未來仲租唔租，抑或乾脆買番幾層物業嚟用，決議結果都係繼續租好過買。國金二期嘅租金勁貴，佢哋會睇吓有冇其他啱心水嘅新址，不過依家仲有好多金融機構排住隊租寫字樓，又要平又要靚，按證公司執董彭醒棠真係幾頭痛。
雖然租金升得厲害，不過佢哋都唔使太驚，皆因佢哋今年業績又有喜訊，據聞今年首5個月嘅稅前盈利多咗約9,000萬元，達5.87億元，去年同期就只有4.97億元，計落有18.1%增幅，就算國金二期Office現址勁加租，都絕對有能力畀得起。
有消息話中環政府合署西座就嚟拆，將建造「超級金融大廈」，諗住畀啲半官方機構進駐，按證公司作為一個以外匯基金成立嘅官方機構，呢幢新大廈落成後，佢哋話唔定有明顯「租金減免」優惠，到時如果可進一步回饋埋買按保嘅人士，就更加冇得頂嘞！
余絲韻