市場熱線：中航科工長線看好

人行最後一次加息？當然冇人寫過包單，但阿爺已講明要救中小企，冇理由一路加息㗎？不過，阿爺始終要遏通脹為先，豬肉食品未加完，又到日用品輪流加，所以都唔好咁老定。

由於今次亦冇加活期存款息率，所以對內銀股有利，尋日略見反彈；保險股主要升隻財險（02328），國壽（02628）更要倒跌，一來消息已係預咗，二來加息對保險股亦有壞處，投保人會對保單投資回報要求高咗；祖國加息，滙豐亦加H按，但中港地主股未見有大沽壓。

依利安達再度回歸

喺汽車股同內房股後勁不繼之時，水泥股嘅耐力最強，真明麗（01868）同億和（00838）呢類低殘股亦大幅反彈。不過，體育用品股就慘情，7隻全跌，李寧（02331）發盈警，拖埋中動向（03818）落水，一齊創新低。體育用品股嘅營運模式一直有問題，搏命開新店，結果自己打自己，同時亦面對品牌老化問題。

同係發盈警嘅有志高（00449），但同時開埋記者會就好少見，另一特別之處係公司攞今年上半年同舊年下半年比較，但冷氣話晒係季節性產品，咁樣比較法有啲牽強。

○五年退市嘅依利安達（01151）今日會「回歸」，古勝對呢隻股冇乜特別回憶，但隻股今年喺獅城表現唔錯，而佢嘅姐妹建滔板（01888）股價仍停留喺52周新低附近，兩間公司亦係上、下游關係，如果依利安達趁貨疏炒起嘅話，建滔（00148）同建滔板亦有睇頭。

業務自然增長強勁

中國近年有個新興嘅行業係私人飛機，用來炫富就最啱，依家個孖屐仲未成熟，低空領域只係試點開放，祖國通用機場亦好少，班大款已急不及待要買飛機，但有錢買亦要排隊。

由於呢個行業先啱啱起步，所以將來個「餅」有幾大真係好有想像空間，亦因為係咁，中航科工（02357）股價一直反覆向上，六月大跌市最低見4.11元，但近日已追回跌幅嘅一半，錯過咗呢個反彈浪嘅股友唔使嘆走寶，因為古勝相信呢隻股仍係反覆上升格局。

中航科工不時炒吓注資重組消息，呢半年好似突然放慢咗，但依家旗下公司嘅業務自然增長強勁，已落實嘅手頭定單包括138架直升機、152架教練機同25架通用飛機。不過，由於公司資產主要係旗下幾間A股上市公司，所以佢嘅股價表現同A股有間接關係。中航科工如果繼續有注資當然好，就算靠自然增長亦唔使憂，可以做長線投資對象。

戰報

環能國際（01102）+25%

上海集優（02345）+17%

古晨上月二十日吼中上海集優，當日低位1.55元，近日股價爆發，至尋日高見1.82元計，埋單獲利逾17%。

古勝