上周五掛牌後股價急升嘅雙樺控股（01241），尋日回吐逾6%，最終以1.47元報收，不過就仍然較其招股價1.16元高出26%。
講起雙樺，筆者雖然冇入飛認購，但對公司招股時所SELL嘅內地汽車維修市場概念，就頗感興趣。近年內地「汽車下鄉」等一系列補貼政策，在短時間內令汽車數目急增，除造就了一眾本土汽車生產商外，未來幾年亦將為汽車維修市場帶來龐大客源，按同一邏輯，舊年九月上市嘅內地中重型卡車零部件供應商暢豐車橋（01039），同樣有留意價值。
展望未來幾年，內地大型基建及保障房等項目相繼動工，對中重型卡車需求勢必有增無減，故暢豐生意真係唔憂做。集團上市後首份年度業績亦相當對辦，純利增長75.5%，至2.86億元人民幣，毛利率由31.4%上升至33.3%，以昨日收市價3.13元計，市盈率僅6倍，業務有前景，估值亦吸引，以8倍PE做目標，睇4.15元，止蝕價2.8元。
詩詩