絲絲講場：伍楊玉如有魔「髮」？
髮型會影響經濟？絲絲尋日與花旗環球個人銀行服務信用卡及無抵押信貸業務總監伍楊玉如（Maggie）食飯嗰陣，佢講開之前喺風險管理部做總監時發生嘅趣事。
當年電「爆炸裝」即遇嘯
話說Maggie以前一直束長直髮，有日心血來潮電咗個「爆炸裝」，返到公司同事就呆咗，最慘係佢電完髮冇耐，百年一遇嘅金融海嘯就殺到嚟。佢嘅上司——行政總裁及總經理盧韋柏（Weber）眼見大市與Maggie嘅髮型一樣咁「爆」，即時拎咗100蚊出嚟，仲叫同事夾錢畀Maggie電直番啲頭髮，最終Maggie都順應民意；估唔到留番長直髮後，經濟即刻又好轉。
不過，絲絲尋日見佢又電咗頭髮，Maggie話Weber初時見到都驚驚哋，不過唔知係咪轉咗部門嘅關係，今次輪到花旗嘅信用卡業務「爆數」，單喺今年五月嘅零售簽帳額已按年增長28%，而俗稱收單業務嘅商戶消費額更按年升36%。Maggie新髮型咁好腳頭，相信Weber都可以放心。
余絲韻