意馬（00585）今年豪擲數億元「捕羊」，收購動漫火車集團《喜羊羊與灰太狼》版權，固然係睇中內地龐大市場，不過潮流興「走出去」，所以就連呢隻國產卡通人物亦急不及待向世界動漫市場出發，意馬今次仲好有心思，喺新戲加咗個相當符合明年龍年主題嘅新角色──「小龍」。
意馬希望趕得切喺明年春節前，開始喺全球發行《喜羊羊與灰太狼大電影4》，其戰略夥伴廣東原創動力總經理劉蔓儀就透露，依家部戲仲係畫面製作中，由於打算加入 Ｄ動漫效果，所以新戲製作成本逾二百萬美元（逾一千五百六十萬港元）。新戲搞到咁大，當然要搵迪士尼旗下電影集團幫吓手，佢哋主要負責內地及香港以外嘅戲院發行，以及中、港、台與澳門電視台、互聯網等新媒體發行。
動漫火車營運總監張玲兒講明，迪士尼今次除咗發行，唔需要投放任何生產成本，但「小龍」版權其實由迪士尼擁有。
余絲韻