絲絲講場：渣打人幣戶口攻細路
絲絲好鍾意卡通公仔，覺得可以令自己重拾童真，尋日見到渣打有個「My Dream Account」人民幣儲蓄戶口，即刻心動想開番個，原因係佢哋今次推出咗香港迪士尼樂園5周年限量紀念版「迪士尼飛天巡遊系列」精品，以「迪士尼飛天巡遊」嘅花車做主題，有「領班小飛象」、「米奇朋友號飛船」及「反斗奇兵一飛衝天號」。
換全套要存100萬？
不過，究竟要存款幾多先可以換到呢啲精品？絲絲一睇先知，原來最少都要存款5萬蚊先可以換到一個，如果係好似絲絲呢啲卡通狂熱分子，想一次過換晒，最少要有100萬元，認真唔講得笑呀！
渣打香港個人銀行業務主管禤惠儀（Mary）同絲絲講，佢話今次除咗有迪士尼卡通人物精品換領，其實存款息率都好吸引，最高有0.5%，比起平時人民幣嘅儲蓄存款牌價高出成倍，希望大人同小朋友都有個咁童真嘅人民幣儲蓄戶口。
余絲韻