市場熱線：中海油服具值博率

依家孖屐期待內地通脹快將見頂，阿爺亦會鬆手，但實情係六月豬肉同菜價仍然升緊，租金同消費品亦加價；反而地方債煲到咁大，但阿爺總有解決方法，亦唔會由錢莊孭晒筆帳。

內銀同內房呢排兩極發展，兩隻內房股成為藍籌升幅榜首，保利香港（00119）連續兩日大升，主要係孖屐憧憬阿爺會鬆手，而個人免稅額調高唔單止益消費股，其實對內房亦有利，但內房、汽車、水泥同鐘錶股已經升咗一個禮拜有多，有貨不妨繼續揸住，但冇貨高追就制唔過，燒冷灶不如諗吓跌到殘嘅內銀股。

渾水魔咒似已失效

政府正式推出「哎幫」，得100億銀咁少，就算做到一人一手，1萬蚊一年得400蚊息，實質幫唔到手，不如買領匯（00823）同祖國移動（00941）好過。雖然「哎幫」喺港交所（00388）上市，但買嘅通常唔放等到夠期，相信成交唔慌暢旺。政府想幫市民對付通脹，一係就大手筆啲，依家搞到唔湯唔水。

自從渾水上次狙擊展信通訊失手之後，古勝都覺得佢嘅魔咒開始失效，好似尋日綠森（00094）同華寶（00336）顯著反彈，淨得雨潤（01068）仲要下跌，當然，前兩者講嘅跌幅係五成以上，雨潤相比跌兩成幾只係小兒科，但古勝認為到20蚊邊可以撈一撈貨，博下月派成績表有唔錯增長。

賣衫股JOYCE（00647）同YGM貿易（00375）尋日齊大升，兩股估值較同業便宜，PE分別得13倍同12倍，而兩間公司賣嘅係貴價衫，受加舖租嘅影響亦會較低。

「田雞王子」看高一線

今日中午有4隻新股截飛，古勝對「田雞王子」（01259）最睇好，香港有唔少怪獸家長，但祖國實施一孩政策更加錫到燶，「變態娘」可能成為內地最新潮語。「田雞王子」就算上限定價都係14倍PE，比起另一隻「田雞博士」（01698）亦較低。

比亞迪（01211）尋日卒之回軟，公司發A股令人跌晒眼鏡，尋日升到33蚊人仔，祖國股民眼光的確零舍唔同。中海油服（02883）上月中亦獲中證監開綠燈增發A股，其現有A股較H股溢價約五成，往績PE係13.3倍，預測PE約12倍，睇估值絕對唔貴，近排表現麻麻皆因國際油價偏軟，佢嘅姐妹中海油（00883）仲要漏油，但壞消息經已反映，近日走勢小圓底向上，勝在風險唔高。

跟隨姐妹公司擴產

就算油價繼續下跌，公司主要生意來自中海油，所以受嘅影響唔大。而中海油今年擴產，資本開支增加73%，中海油服亦跟住擴產，增發A股集資所得近百億，主要用來買船，未來三年產能會快速增長。無可否認，中海油服首季賺少咗令人失望，就快派中期成績表，孖屐唔會期望咁高，如果能夠達到預期嘅話，公司同國際同業嘅PE比較會顯得吸引，所以隻股有幾大值博率。

戰報

遠洋地產（03377）+23%

高仁上月二十二日推介過遠地後，近日接連爆上，由當日低位3.56元，至昨日高位4.37元計，累計升近23%。

上實城市開發（00563）+13%

古晨上周一向大家推薦隻上實城開，股價當日最低見2.22元，至昨日最高位2.5元，累積升接近13%。

古勝