大家知唔知時下中學生會用乜嘢創富工具？花旗做咗個理財調查，喺超過一萬份中學生問卷中統計出，物業已成為最受歡迎嘅創富工具，其次喺股票及外幣。
調查仲發現，過去5年學生對股票嘅歡迎程度下滑，而物業及外幣投資就愈嚟愈受重視。絲絲覺得，一來反映咗學生明白分散投資以減低風險，二來見到時下嘅中學生認真「貼市」，皆因近年本港樓市火熱，股市相對嚟講就反覆啲，可見佢哋捕捉到香港嘅市場情況。
咁中學生有啲乜嘢理財目標呢？有逾33%受訪者話首要係對抗通脹，約五成人就話長遠嘅財富累積及籌劃未來最重要，目標咁明確，難怪花旗集團香港區行長章晟曼都大讚，年紀輕輕嘅學生已深明理財對保障未來嘅重要性，實在令人鼓舞。
絲絲覺得，仲有個調查結果會令章晟曼感到鼓舞，就係有超過六成受訪者目前有使用銀行戶口儲錢，呢班社會未來棟樑自小已用「紅簿仔」儲蓄，相信銀行未來會有大把商機。
余絲韻