易運錢：中郵電貿有機炒上

成日話「大淡好尾市」，套用喺上半年嘅港股身上，又真係幾貼切，恒指在六月最後一個交易日顯著做好，逼近22,400水平，仲收復埋條20日線，雖然唔排除係基金粉飾櫥窗，但希債危機暫時紓緩，港匯又見轉強，都唔能夠抹殺「五窮六絕七翻身」嘅可能。

若然自問仲係睇唔清後市大方向，搵啲有消息嘅股仔細細哋炒住先亦無妨。創業板股中郵電貿（08041）宣布完成收購傑軒51%權益。據收購通告，傑軒截至去年六月底止的年度盈利736萬元，以此計算收購作價為11.3倍PE。

集團五月中宣布向美資SpringTree Global Investors, LLC旗下基金配股，發行不超過1.65億元的股份，每股定價方式是以0.3元或三個指定日期股價加權平均價的低者為準，亦即若加權平均價愈低，則需要發行的股份便愈多，可視作為股價炒上留下伏線。中郵電貿上周四升2.4%，0.212元報收，可順勢跟進炒一轉，目標0.25元，止蝕0.2元。