絲絲講場：內地電訊大換班揭幕
雖然近排內地三大電訊商都否認高層變動嘅傳聞，但正所謂「要發生嘅總會發生」，掌管內地官場人事嘅中央組織部尋日就宣布，工信部副部長奚國華將會出任中移（00941）母公司中移集團嘅黨組書記兼副董事長，雖然變動暫不涉及本港上市中移董事成員嘅變動，而王建宙仍然擔任董事長職務，但一般相信今次任命係為王建宙嘅退休鋪路，同時更可能係內地三大電訊商管理層再一次「大挪移」嘅序幕！
坐正只係時間問題
奚國華今次調職與之前傳聞嘅主要分別，就係佢只獲委為中移集團嘅副董事長，但由於佢所接掌嘅黨組書記職務原本由王建宙兼任，再加上62歲嘅王建宙早已屆退休之齡，所以一般相信奚國華加入中移董事會以至繼任中移舵手只係時間問題。
咁邊個代替奚國華原本個位？暫時就未公布，但根據之前嘅傳聞，中電信（00728）總裁尚冰相信係熱門人選，由此睇嚟之前有關內地電訊公司高層將再次出現「大挪移」嘅猜測亦非空穴來風。
余絲韻