之前絲絲與大家分享過，話內地最大房企之一嘅萬科董事長王石雖然年屆60歲，但仍然努力不懈為自己定下3年留學目標，眨吓眼佢已經做咗半年留學生，應該最少讀完一個學期嘞。雖然名為學生，但佢嘅課外活動似乎與其他同學好唔同，同學仔去聽Talk（講座），佢就去講Talk，仲喺台上話「情不自禁」想喺紐約買樓添。
《紐約時報》連續第2年主辦嘅「紐約論壇」，今年因為中國熱，特設咗一個中國專場討論，題目係《中國模式》。除咗邀請王石之外，講者仲包括復星集團副董事長兼首席執行官梁信軍以及其他內地大公司嘅高管。
王石當然講番自己嘅專長─地產啦，佢話呢半年喺哈佛讀書，親身比較過中、美兩地房價及房屋質量，唔比較猶自可，一比較就不得了！「情不自禁想喺紐約投資買房子，比起喺北京、上海買房子都便宜。」佢仲話，中國有啲大城市嘅房價太高，好難持續落去，一旦房地產泡沫破滅，影響將會好大。
其實類似嘅言論，瑞信嘅星級分析員陶冬喺早兩日都講過，佢話有個朋友喺美國佛羅里達州以15萬美元買咗一幅地，足夠興建4幢獨立屋，但相同價錢只可以喺上海買個廁所，又或者喺海南島買兩個廁所。
美國人均GDP（生產總值）高過中國差唔多11倍，但樓價低咁多，睇嚟內地房地產嘅泡沫真係好大喎。
佘絲韻