市場熱線：江銅增長潛力佳

建行（00939）驚住美銀沽貨，成為跌幅最大藍籌，800億銀有冇人肯接？如果孖屐一take過，對建行反而係好事，衰在要等到八月，到時都唔知乜世界。水泥股俗語所謂一擔沙糖一擔屎，同「股市放大器」冇乜分別，難得嘅係中電信（00728）同東風（00489）呢類冇「陪跌」嘅股亦可升3%以上。

博反彈千祈唔好貪

事實上，尋日勁升嘅股都係早前勁跌嘅股，例如中星（00055）、蒙能（00276）、綠森（00094）、時富孖寶（01049及00510）等，升番少少都未夠買膏藥貼傷口，呢類股博反彈賺一兩成已心滿意足，因為前路蟹貨重重。古勝都好服「賺錢之神」普爾遜嘅壯士斷臂，嘉漢林業蝕咁多照清倉，當然，人哋嘅錢零舍疏爽，芬佬洗倉從來唔會錫住你嘅荷包，今個月已見識唔少。

今年有唔少對沖基金執笠，睇落好似好慘，但學前輩話齋，對沖基金有錢賺就同你分佣（兩成），但蝕錢就要追番之前虧損額至可以分錢，所以蝕本基金寧願關門大吉然後另起爐灶。

跌市如果加埋成績表唔合格嘅話，自然死多兩錢重，呢排有幾間公司派成績表或發盈警而遭洗倉，包括敏華（01999）、華寶（00336）、晨訊（02000）、昂納（00877）等。最奇係華寶，派成績表後隔日至大跌，但呢隻不嬲係基金股，可能見完分析員後被降評級。

敏華洗白白後有回穩迹象，話晒大股東增持、PE得10倍、息率有4厘。昂納由高位暴瀉62%，上市首年谷得盤數太靚，第二年就開始現形。晨訊搞到要見紅咁慘，但管理層話對下半年前景有信心，你信唔信？公司除咗即時回購之外，有班員工啱啱喺上半月以每股0.79至0.81元行使咗認購期權，行使時係大溢價，但發盈警後變咗折讓。

呢排金屬價格走勢好唔同，鋼企要減價，但稀土則升得好犀利，不過未必益到中國稀土（00769），因為下游客戶未必接受到上游礦價升幅，所以買金屬相關股亦要睇吓佢屬於生產鏈邊部分。中鋁（02600）同江銅（00358）阿媽都揸住稀土礦，兩隻股都炒過注資，但由於阿爺太過重視稀土資源，注資等於變相將資產落入外資手上，所以只係發夢。

致力提升自給產量

不過，江銅淨係做本身業務今年已唔使憂，首季已賺多1.3倍至15.8億人仔，今年預測PE只係9倍左右。國際期銅價格年初曾經升到過萬美金歷史高位，依家仍然企喺9,000美元樓上已相當難得，主要原因係庫存量減少同需求旺盛。江銅其實仍要靠入口，但今年積極增加自己礦山嘅產量，目標係產礦產能提升到20萬噸以上，喺金屬股當中，江銅算係穩陣兼大有增長潛力。

戰報

華建控股（00479）+13%

帥哥於五月二十六日推介嘅華建，尋日一度搶高至0.97元，以當日低位0.86元計，最多賺近13%。

山水水泥（00691）+13%

古晨上周二睇中隻山水水泥，當日低位只係7.55元，尋日高位做8.2元，累計已賺近9%。

古勝