孖妹缸湖遊：財圈長輩傳承錦囊

孖妹深知自己平時唔夠孝順，所以喺尋日父親節專登向爸爸「贖罪」，幫佢揼吓骨，紓緩工作嘅疲勞。由於工作忙，我哋陪伴父親大人嘅時間唔多，一有機會當然要盡點孝道，好似兩位金融界殿堂級嘅公公、爺爺咁話，其實只要有心，日日都係父親節，佢哋仲向後輩分享幾十年來累積嘅理財心得添！

林海涵嘅長女Ivy（上）、二女Fiona（右）及幼女Vivian（左一），都喺爸爸嘅會計師行工作。

人稱「生哥」嘅張天生，一九五八年加入本港早期嘅證券交易所「香港會」，由「紅褲仔」做起，喺證券界打滾逾50年，現任香港證券業協會永遠名譽會長及星展唯高達香港營業部董事。佢有兩子一女，依家仲係幾個小朋友嘅爺爺，最大嘅孫兒已14歲。

另一位金融界公公係執業會計師林海涵，40多年前香港嘅大學未設會計學位課程，喺港大讀完經濟嘅佢為咗成為特許會計師，要遠赴英國嘅特許會計師事務所做學徒，其後成立會計師行，佢嘅3位千金依家都喺公司幫手。

張：香港證券業協會永遠名譽會長、星展唯高達香港營業部董事張天生

張天生（前排左一）與妻子及兒孫合照，幸福滿瀉。

唔怕蝕底穩陣至上

祺祺：剛啱過咗嘅父親節你點樣度過？

　張：我有兩子一女，兩個仔都喺澳洲，佢哋唔會特別飛返嚟同我慶祝。我同喺香港工作嘅女兒都話「唔得閒唔使專登食飯」，平時返工咁忙，家人之間就連大家嘅生日都未必會記得，只要子孝孫賢，日日都係父親節。我平時會與兩個仔通電話保持聯絡，一家人感情好係理所當然。

高妹：有好多人加入金融界都係為咗賺大錢，你點睇？

　張：錢唔使多，只要夠用就得，仲要唔好怕蝕底，只要蝕得起，吃虧其實冇所謂，好多人都會因為你呢種性格同你做好朋友。

祺祺：你喺證券界有50幾年經驗，如何將炒股技藝傳授畀下一代？

　張：我向仔女講到明，唔會將家產留畀佢哋，有錢我都會自己使晒，所以佢哋要畀心機讀書，咁先會受益。我個女讀會計，做過證券行，依家從事法規事務工作（Compliance）；大仔喺澳洲公司開託兒所，細仔喺當地銀行做電腦程式，兩個仔喺悉尼都有物業，唔使我擔心。佢哋細個嗰陣，我得閒會同佢哋分享吓自己嘅工作，所以佢哋無論選科或就業嘅抉擇都會受我影響。當仔女結婚嗰陣，我有幫佢哋畀買樓首期，因為最緊要係自己有屋。

不沾輪證睇淡滙控

高妹：張爺爺可否教吓我哋點樣投資？

　張：我係保守型穩陣派，雖然有啲客戶都會做孖展買賣，但我喺呢10年來冇叫過客戶買窩輪及牛熊證，我成日都話呢啲衍生產品，買10次有10次都輸錢，所以唔買得，如果真係想投資，買高息股及物業好過。美國嘅衍生工具咁多，你睇番雷曼事件就知，呢啲產品唔係為客戶搵錢，只係與客戶對賭。銀行股唔錯，不過我唔睇好滙控（00005），當外圍因素欠佳，會利淡海外業務比重高嘅銀行，而且佢哋喺供股後，只係將資金用嚟還債，簡直係搵香港人笨。

祺祺：恒指上周跌穿22,000點關，係咪會繼續調整？

　張：雖然美國經濟前景暗淡，一旦該國無法償還欠債會對股市造成衝擊，但相信大市嘅壞氣氛會紓緩，投資者可分段吸納股份。長線嚟講，長實（00001）及和黃（00013）走勢唔錯，恒生（00011）亦係好股票；另外，國壽（02628）已經調整至約24元水平，估值便宜。值得留意嘅係，內地股市受制於大陸政策，走勢飄忽，要批股及供股嘅民企唔值得考慮。

林：執業會計師林海涵

Ivy：林海涵長女

未雨綢繆切忌投機

祺祺：你嘅3個女真係好乖，一齊喺爸爸開嘅會計師行做嘢，幫手分擔爸爸嘅工作。

Ivy：我哋4個人平日會一齊食午飯，關係好親密，比一般家庭見面次數更多。由細到大，爸爸都話做呢行好穩陣，會計永遠係最後先畀人「炒」嗰個。

　林：會計呢行好「怪」，公司開張要搵會計幫手；就算要執笠，會計專業人員都係最後被辭退嘅一群，所以我成日都同啲女講，呢個係好穩陣嘅行業，有一份好職業就有安全感。我以前有為3個女買教育基金，一旦自己有乜「唔妥」，佢哋都仲有錢讀書。我其中兩個女已經有小朋友，所以我都叫佢哋要為女兒買教育基金，佢哋都有聽我話。

高妹：我聽Ivy講，佢平時除咗與年紀差唔多嘅兩個妹傾吓投資產品，仲會問吓爸爸意見。

Ivy：有一次諗過買股票掛鈎票據（ELN），於是問爸爸意見，佢第一句就問「可能面對嘅最大風險係乜嘢」，我考慮過後知道無力面對咁大嘅風險，所以最後冇買。

　林：投資最緊要係唔好貪心，年輕人千祈唔好投機，冇產品係可以今日買完，聽日價格就大幅飆升，我自己會以平均成本法月供基金及股票。好似我啲女兒依家喺會計師行工作，每月有可觀收入，可以利用工資買基金或股票，若覺得已到「收割期」，可將部分套現投資物業。3個女兒同我係一脈相承，投資方針亦與我一樣，係穩陣派。

只買平穩增長藍籌股

高妹：你有冇教3個女點樣理財？

　林：佢哋咁大個女，如果真係去投機，撞過板就知我講嘅嘢係啱。錢唔會自己跌落嚟，唔可以咁大使。

祺祺：咁你對投資有乜嘢心得？

　林：做會計師呢行要好專注，冇時間去研究股票，我買嘅股票一定係股價平穩增長嘅藍籌股。我相信滙控長遠一定會好，如果將來可以攀升至200元，依家仍然值得吸納；另外，買長實亦唔會點衰。我喺沙士時期賣咗啲基金，國際性基金投資嘅唔係港股，基金價格冇因為沙士而拖低，我將啲資金用咗嚟買樓收租。人口老化提高咗醫療需求，我依家有買醫療老人設備基金。