市場熱線：中電信憧憬注資

「七翻身」有保留

期指收市踩多腳，低水89點，依家只能寄望希臘單嘢有轉機，但反彈亦恐唔成氣候。恒指乜位都穿晒無位可守，其實跌穿22,500點之後兩日升唔返，已係最大沽貨訊號，穿咗一個咁大支持位起碼都要踩多1,000點，但呢個只係最保守估計，最驚係個市已轉角，到七月都唔能夠翻身。

內銀股又驚加息又驚壞帳，富時指數調整算係幾強，建行（00939）同工行（01398）都逆市升，前者有散戶築起血肉長城都幾壯觀，但最強係中石油（00857）連升兩日，古勝推介嘅「最佳公用股」粵投（00270）亦升3.6%，但一向穩陣嘅昆能（00135）已頂唔順跌咗5.8%。

好多二三線股跌到冇眼睇，時富投資（01049）再跌近兩成，綠森（00094）又跌返到1蚊，上周五洗倉最勁係碼頭股，大連港（02880）同廈門港（03378）分別下跌10.92%及9.79%，魏橋（02698）亦跌近一成，往績PE得3.15倍！

四川成渝（00107）狂跌12%，呢排祖國傳媒猛咁同公路收費翻舊帳，有報道成渝高速重慶段違規收費超過10年，多收咗超過100億人仔。呢段路唔關上市公司事，但阿爺依家施加壓力要減路費，所以呢排公路股都幾慘情。不過，「你戇」就唱反調，話孖屐對消息太過敏感，寧滬（00177）同滬杭甬（00576）計食息都好過公用股好多。不過，古勝提醒大家買H股收息記住唔好用個人名義持有，否則中央會抽水兩成。

之前長升長有嘅聯通（00762）近兩日好似倒水咁，而上周五成交更激增到30億元。佢兩個對手反而好硬淨，祖國移動（00941）發揮佢公用股本色，而中電信（00728）繼續窄幅上落，睇SDI近期見澳洲聯邦銀行同Capital先後減持，但機構投資者大手沽貨仍然可以咁硬淨，接貨嘅亦胸有成竹。

3G業務值得睇好

中電信仍係等住幾時有CDMA版「哎瘋」出，依家「哎瘋」獨大，所以開出嘅合作條件聽聞好「辣」，亦因此搞到咁耐都傾唔埋欄。

至於個「三網融合」亦係等到頸都長埋，有消息話因分贓唔勻嘅問題已經夭折，但阿爺一向五時花六時變，所以隨時會有驚喜。當然，中電信最值得等待嘅係阿媽幾時注入資產，今年係發圍搶客嘅時候，巴克萊早兩個禮拜發報告建議「增持」，目標價睇5.4元，主要係話公司已逐漸走出捱打局面，3G業務同規模會愈做愈大。

古勝亦建議可以揸住呢隻股票，中長線會有可觀回報。

戰報

威高股份（01066） +16%

小尾五月二十三日推介威高股份，以推介日低位9.99元計，至上周五高位11.58元，最多賺16%。

龍昌（00348）+12%

古晨上周五叫留意龍昌，於低位0.42元上車，即日炒上高位0.47元，最多可賺近12%。

古勝