你有冇諗過，一旦屋企火燭，最想搶救乜嘢呢？微軟創辦人蓋茨就話要搶救佢收藏嘅達文西筆記簿，仲有牛頓及林肯嘅文件以及一啲藝術品，「因為若失去任何一件，都會令人覺得好慚愧」。
雖然蓋茨未讀完哈佛就走咗去搞公司，但並冇影響佢對閱讀嘅興趣，佢係名副其實嘅書迷，佢嗰間造價高達一億美元嘅大屋，裏面就有一個圖書館。
一頁一頁咁揭嘅書可能有書香，所以蓋茨好鍾意「打開書」嘅感覺，而佢嘅最愛就係達文西嘅筆記簿《萊斯特抄本》，佢喺九四年花咗3,080萬美元（約2.4億港元）買呢本書，到依家仲係愛不釋手，佢猛話自己能擁有呢本筆記簿係好幸運。
蓋茨一直對達文西好着迷，因為達文西獨自從事科學，又將自己嘅諗法畫出嚟及寫低。
蓋茨仲擁有牛頓及林肯嘅文件，以及一啲好正嘅藝術品，佢話唔想失去任何一件。淨係達文西嗰本書就值三千幾萬美元，咁大家估吓牛頓及林肯嗰啲值幾多錢呢？
余絲韻