金融界有唔少攝影發燒友，除咗胡經昌之外，董事學會主席及中遠太平洋（01199）董事副總經理黃天祐原來都係，不過佢近年工作好忙碌，再冇好似以前咁可以花時間喺攝影上。
話說有次絲絲訪問黃天祐，之前例牌要影吓相，殊不知佢對攝影師嘅相機非常感興趣，仲閒聊起來，討論咗一連串絲絲唔多識嘅鏡頭、相機種類等話題。
黃天祐話佢以前好鍾意攝影，得閒就買唔同嘅器材番嚟鑽研，不過近幾年工作好忙，冇咁多時間玩相機喇。
咁又係嘅，黃天祐除咗係中遠太平洋要員，時時要飛去唔同地方開會之外，佢嘅公職又一大籮，除咗係董事學會主席，亦係港交所（00388）上市委員會委員以及幾間公司嘅獨立非執董。
呢排股市雖然表現麻麻，跌多過升，但公司排隊上市仍陸續有來，聽聞上市委員會近期就要加班，一星期開兩次會審批公司上市，除咗星期四之外，星期二都要開埋會。
雖然唔係每星期都要開上市委員會，但黃天祐仲有咁多工作要做，佢當然冇時間玩相機，而絲絲就好有興趣想睇吓佢以前嘅攝影作品。
余絲韻